Bigarren fasera igaroko da Gasteiz Hobetuz programa, herritarrek udal aurrekontuaren zati bati buruz erabakitzeko ekinaldia. Hala, 84 proposamen argitaratuko dira, eta bozketa egingo da martxoaren 4tik 24ra.
Aurtengo ediziora 228 proposamen aurkeztu dituzte eta udal-teknikariek aztertu ondoren, hainbat aukeratu dituzte. Lan horren ondorioz, 111 bideragarriak zirela ezarri zuten. Ondoren, 27 bateratu dira, interes bera edo oso antzekoa zutelako. Beraz, azkenean, 84 proposamen bozkatuko dituzte herritarrek martxoaren 4tik aurrera hogeita bat egunez.
Bigarren fasera igaro diren 84 proiektuak aztertuta, 56 (%66,6) norbanakoek (32 emakume eta 24 gizon) bultzatu dituztela ondorioztatu dute. Gainerako 28ak (%33,3) elkarteek, kolektiboek edo taldeek aurkeztu dituzte. Zonen araberako eraginari dagokionez, 18 proposamenek udalerri osoan eragina duten jarduketei egiten diete erreferentzia. Gainerakoa 31 auzoetan banatzen da, eta Lakua-Arriaga eta Zabalgana dira proiektu bideragarri gehien biltzen dituztenak.
Proposamen bideragarrien zerrenda udalaren webgune honetan kontsulta daiteke: Udalaren webgunea. ‘Vitoria-Gasteiz Hobetuz’ – Baloratutako proposamenak. Bozketa-aldia hastearekin batera, martxoaren 4an, proposamenak xehetasunez argitaratuko dituzte, herritarrek sakon ezagutu ditzaten. Horien artean, besteak beste, Sansomendiko saskibaloi-kantxa berritzea, erraldoi eta buruhandien txokoa, San Kristobal zubia birgaitzea, Olarizun gazteentzako aisialdi gunea jartzea, kaleko gimnasio gehiago sortzea eta hildako etxeko animaliak oroitzeko gune bat sortzea proposatu dute herritarrek.