Ohar batean ezagutarazi dutenez, Arabako ESIko Erizaintzako Zuzendaritzak "langile murrizketa" bat egin du Santiagoko ospitalean, "plantillaren berregituraketa" bat argudiatuta. Sindikatuaren arabera, Zuzendaritzak erabaki hori justifikatzeko emandako arrazoia izan da bertako larrialdietan ematen den arreta jaitsi dela. Bestelakoa da sindikatuaren irakurketa: "Santiago ospitaleko larrialdiak eraisten jarraitzen dute".
Sindikatuak zuzendaritzaren erabaki "aldebakarra" kritikatu du, eta adierazi du Osakidetzak ez dituela aintzat hartu Santiago ospitaleko larrialdi zerbitzuetara jotzen duten biztanleen berezko ezaugarriak. "Gehienak adineko pazienteak dira, patologia askotarikoak, eta zaintza handiak behar dituzte horiek egonkortzeko", argudiatu dute.
Erantsi dute ospitalean larrialdi psikiatrikoetarako zerbitzua jarraitzen duela, eta horiek erizainek eta erizain laguntzaileek artatzen dituztela. Azaldu dute sarritan larrialdi horiek artatzeko bi erizain behar direla, eta, ondorioz "pazientearen segurtasuna arriskuan" egongo dela. Bestetik, gaineratu dute horrek guztiak "nabarmen handituko" duela Olagibelgo Etengabeko Arreta Gune "saturatuan" artatu beharreko pazienteen kopurua.
Arabako ESIak "duela ia bi urte erabaki zuen Txagorritxu ospitalera eramatea larrialdiko arreta, eta Santiagoko larrialdiak de facto ixtea erabaki zuen", salatu dute. Osasun alorreko agintariei eskatu diete "pertsonak zenbaki soiltzat hartzeari uzteko" eta "osasun publikoaren merkataritza kudeaketa" alde batera uzteko.