Gasteizko Udalak Alde Zaharreko arrapala mekanikoen eta igogailuen mantentze lanen ardura duen enpresari 6.000 euroko isuna jarriko dio, erakundeak ohar batean iragarri duenez.
Ostiraleko gobernu kontseiluan onartzekoak dira Espazio Publikoaren eta Auzoen Sailak proposatutako bi zigor espedienteak. Udalaren arabera, azpiegitura horren mantentzearen esleipena duen enpresak ez du kontratua bete.
Beatriz Artolazabal zinegotziaren hitzetan, enpresak ez ditu udaberrian atzemandako matxurak konpondu, eta "egoera txarrean dauden piezak ordezkatzeko garaian" ez ditu kontratuan adostutako baldintzak bete. Dioenez, enpresak 40 hutsegite egin ditu mantentze kontratuan, eta horietako gehienak "larriak" izan dira. Besteak beste, uztailean Bakardade kantoiko eskailerak hilabete osoan egon ziren matxuratuta, eta Apaizgaitegiko kantoiko igogailua hamar egunez baino ez zen egon erabilgarri.
Artolazabalek nabarmendu du ez dela "onargarria" mugikortasun arazoak dituzten lagunentzako funtsezkoak diren zerbitzuetan horrelako gorabeherak egotea. "Hiriaren zati honetan, adineko pertsona ugari bizi dira eta, arrapalei edo igogailuei esker, osasun zentrora irits daitezke", erantsi du. Zinegotziak iragarri duenez, auditoretza bat eskatu dute, bai eta beste zenbait txosten tekniko ere.