Gasteizko herri mugimenduak urteurren berezia borobildu du

Erredakzioa 2023ko urriaren 23a
Deskargatu Info Ahotsak :
Español English Français Català Galego

'100 urte bakarrik ezin da!' dinamikaren barruan Gasteizko herri mugimenduko hainbat kolektibo ospatzen ari diren urteurren bateratuak festa handia izan zuen larunbatean. Ekimen andana izan ziren hirian zehar eta, eguerditik aurrera, Errekaleorren.

Argazkiak: @100dugasteiz eta Dos Por Dos

Hala Bedik 40 urte, Gaztetxeak 35, Auzolana Pilotalekuak 15, Errekaleor Bizirik!-ek 10 eta Sumendik 7 urte... Guztiak batera "100 urte baino gehiago Gasteiz eraldatzen" egon direla aldarri, Gasteizko hainbat herri mugimenduk hitzordu garrantzitsua izan zuten larunbatean, urriaren 21ean. 100 urte bakarrik ezin da leloari eutsi diote azken hilabeteotan ekimenari ekiteko, eta asteburu honetan ere hori izan da abiapuntu nagusia.

Hainbat espaziotan antolatu dituzte ospakizunak. Hala Bedi parean dagoen Kai plazan artisau eta kolektiboen azoka jarri zuten 10:30etik aurrera, Zuretzako Mezua kolektiboaren soinu jamaikarrek lagunduta. Gaztetxearen ondoan dagoen Rafa plazan, berriz, umeentzako jolasak egin zituzten. Bertan ere zunba herrikoia egin zuten, eta Txan Magoaren zein DJ Malandro & Xerularen emanaldiak izan zituzten.

Gasteizko erdialde eta Alde Zaharrean zehar, berriz, Judimendiko Joaldunak eta Arai Erraldoi konpartsa izan zituzten. Eguerdian Bode tabernatik Gasteiz Kantuz abiatu zen. Farolonen, berriz, Lander Garciak bisita memorialista gidatu zuen.

13:00etan, Gaztetxean hasi eta Errekaleorreraino iritsi zen ehunka lagun bildu zituen mani-kalejira. Behin auzo okupatuan, ekitaldi bat egin zuten kolektiboek, eta, ondoren, herri bazkaria. Besteak beste, umeentzako puzgarriak eta antzerkia izan ziren, bai eta askotariko kontzertuak, pintxadak eta ikuskizunak ere, goizaldeko ordu txikiak arte: Bidelapurrak, 19Hz (Miren Narbaiza eta Aitor Garcia de Vicuñaren proiektua), Ginger, DJ Malandro & Xerula, Nakar, Lekittoko Deabruak, Willis Drummond, Albina Stardust eta DJ Eromena.

JARRAIPENA

Gizartea Gasteiz

Izan zaitez ALEAkide!

ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu? Aukera ezberdinak dituzu gure proiektuarekin bat egiteko.

Informazio gehiago