Ostegun honetan, 09:00ak aldera, Salburua auzora bidean zegoen tranbiak 72 urteko emakume bat harrapatu du Gasteizko Florida kaleko 96. zenbakiaren parean, Calasanz ikastetxearen inguruan. Udaltzaingoa, suhiltzaileak eta anbulantzia bat bertaratu dira, handik igarotzen ziren oinezkoen eta gidarien begirada harrituaren aurrean.
Emakumea tranbiaren azpian harrapatuta gelditu da, eta suhiltzaileek askatu behar izan dute, osasun langile eta udaltzainen laguntzarekin. Emakumeak zauriak zituen buruan, hanketan eta besoetan. Bertan artatu ostean, Santiago Ospitalera eraman dute anbulantzian.
Udaltzaingoa istripuaren nondik norakoak ikertzen ari da. Antza denez, emakumeak zebrabidea gurutzatu du tranbia gertu zegoela ohartu gabe. Tranbia-linea horren zerbitzua ordu laurden inguru eten behar izan dute.
Ez da bertan gertatutako lehen harrapatzea. Izan ere, bizilagunek behin baino gehiagotan salatu dute inguru horretan arriskua areagotu egin dela BEIa eta tranbia iritsi zirenetik.