Gaur goizean goiz Guardia Zibilak polizia operazioa abiatu du Gasteizko Zabalgana auzoan. Zenbait hedabidek zabaldutako informazioaren arabera, operazio horretan lagun bat atxilotu dute, islamismo erradikalari lotuta dagoelakoan.
11:30ak aldera zabalik jarraitzen du Sofia Erreginaren etorbidearen 96. atarian egindako miaketak. Auzokide batek ALEAri azaldu dionez, metrailetak eskutan dituzten guardia zibilek atari horren inguruan jarraitzen dute, eta ez diote uzten inori atarira hurbiltzen.
Guardia Zibilak ez du argitu operazioaren abiapuntua jihadismoari lotuta ote dagoen, agindu judiziala dela-eta ikerketa sekretupean dagoelako.
Espainiako Justizia ministerioko erregistroen arabera, atari horretako pisu batean Gasteizko Al Fadjr komunitate islamikoak du egoitza.