Euskara hurbil, zu urrun heltzeko lelopean, ikasturte honetako matrikulazio kanpaina abiarazi du AEKk. Besteak beste, aurrez aurreko klaseak (hiru egunekoak eta aste osokoak), online bidezko klaseak, autoikaskuntza, ikastaro trinkoak, mintza taldeak eta C2 ziurtagiria lortzeko klaseak eskainiko ditu aurten Gasteizko AEKk. Eusko Jaurlaritzak, Arabako Foru Aldundiak eta Gasteizko Udalak diruz lagundutako ikastaroak dira
Ikasle gazteek C1 ziurtagiria lortzeko beka da ikasturte berrirako nobedade nagusia. Izan ere, C1 maila doan prestatzeko diru-laguntza berria eskaini du HABEk 16-18 urte bitartekoentzat, eta, horrela, euskara ikasteko ahalegina egiteagatik 20 euro baino ez dute ordaindu beharko ikasleek oinarrizko kuota moduan.
Ikastetxean bertan eskola orduetatik kanpo ikasteko aukera egongo da, euskaltegi baten eskutik ikastetxean antolatutako ikastaroan, edota euskaltegian, gazteek euren kasa, maila horretako ohiko talde batean.