Ertzaintzak 49 urteko gizon bat atxilotu du larunbat goizaldean, Gasteizko jaietako lehen gauean emakume bati sexu erasoa egitea egotzita. Gertakaria 02:00ak aldera izan da, Santiago ospitalearen inguruan, patruila batek gizon bat korrika eta hainbat pertsona haren atzetik ikusi dituenean.
Agenteek gizon hori geldiarazi eta gertakariari buruzko informazioa bildu dute. Hainbat lekukok ertzainei adierazi dietenez, gizona lurrean etzanda zegoen emakume baten gainean, eta ukituak egiten ari zitzaion, bere borondatearen aurka.
Inguruan zegoen biktimak gertaera horiek berretsi ditu, eta adierazi du ustezko egileak "indarrez eraman duela bazter batera", eta han atxikita eduki duela. Ertzainek gizon hori atxilotu dute, sexu askatasunaren aurkako ustezko delitu bat egotzita, eta, ondoren, ertzain-etxera eraman dute, beharrezko eginbideak hasteko. Amaitutakoan, Gasteizko Guardiako Epaitegiaren esku utziko dute.
Tratu txarrak pairatzen badituzu edo kasuren bat ezagutzen baduzu, deitu telefono hauetako batera: 900 840 111 (EAEn) edo 016 (Estatu osoan); doakoak dira eta ez dute arrastorik uzten fakturan, baina bai telefonoan. Beraz, ez ahaztu ezabatzea.