Urtero bezala, aurten ere indarrak batu ditu Gasteizko LGTBIQ+ mugimenduak ekainaren 28an kaleak hartu eta sexu-genero disidentziaren harrotasuna aldarrikatzeko.
E28 Koordinadoraren barruan, EHGAM Gorbeialdea, Miaukatuz Kirol Kluba, Lumagorri Heterosexismoaren Aurkako Taldea, Zirriborroak Kultur Elkartea, Gasteizko Bilgune Feminista, Zokorrak eta Orbain Kultur Elkartea elkartu dira aurten, ekainaren 19tik 30era bitartean egitarau oparoa antolatzeko. Joan den astean, besteak beste, boleiboleko ate irekien eguna, dokumentalen eta film laburren proiekzioa eta sexu askapen topaketak antolatu zituzten Gasteizen eta Gorbeialdean.
Hitzordu nagusia asteazkenean izango da, ekainaren 28an, LGTBIQ+ Harrotasunaren Egunean: 19:00etan izango da manifestazio nagusia, Gasteizko Andre Maria Zuriaren plazatik abiatuta. Zaindu dezagun elkar faxismoaren kontra! leloa aukeratu dute aurten, hauteskunde giroan alderdi ultraeskuindarren gorakadaren aurrean elkar zaintza aldarrikatzeko.
Zine-foruma, hitzaldia eta jaialdia
Gainera, aste honetan ere, antolatutako egitarauarekin jarraituko dute. Astearte honetan, ekainaren 27an, 20:00etan, Vida en trans eta La vida de una transexual en Pakistan dokumentalak proiektatuko dituzte Orbain Kultur Elkartearen lokalean, Navarro Villoslada kaleko 8. zenbakian; ondoren, Santa Klaux DJ gasteiztarraren pintxadarekin jai giroan murgilduko dira.
Bestalde, ostegunean, hilaren 29an, Zokorrak taldeak Albina Stardust-en Drag is everywhere hitzaldia eskainiko du Agurainen, 19:00etan Manu Yanke lokalean.
Azkenik, ekainaren 30ean, ostiralean, bi hitzordu izango dira. Alde batetik, Zirriborroak Kultur Elkarteak Ama, gay agendak marrazki bizidunak izorratu dizkit hitzaldia eskainiko du, 18:00etan Ikusguneren egoitzan, Pintore kalean. Bestetik, Zokorrak taldeak hainbat jarduera antolatu ditu Agurainen: 19:00etan elkarretaratzea San Juan plazan; 19:30ean trikipoteoa; 21:00etan merienda eta afaria Santa Maria plazan; eta 22:30etik aurrera, jaialdia Latsarri Gaztetxean, Las Maris DJen eskutik.
EGITARAUA
