Joan den asteartean BEI autobusak harrapatutako 70 urteko emakumea bart hil da. Herritarren Segurtasunerako Sailak baieztatu duenez, Santiago ospitaleko medikuek ezin izan dute ezer egin hura salbatzeko, oso larri ospitaleratu ostean. Legealdi honen erdialdean jarri zuten martxan autobus elektriko adimenduna.
Salbaterrabide kaleko 28. zenbakian izan zuen ezbeharra emakumeak, 14:30ean; BEI-ak sorbaldan jo zuen andrea, erori egin zen, eta plataformaren ertzarekin jo zuen buruan. Udaltzainen lau talde bertaratu ziren, eta anbulantzia iritsi arte laguntzen saiatu ziren, konorterik gabe baitzegoen. Ospitalera "oso larri" eraman zuten, eta ostegunean jakinarazi zuten medikuek hil egin zela.
Tuvisatik komunikatu bat bidali dute, doluminak emanez: "Tuvisako presidenteak eta zuzendariak kontseiluari jakinarazi diote aste honetan BEI-ak harrapatutako emakumearen heriotzaren berri. Biek emango dizkiote doluminak hildakoaren familiari, eta ibilgailuaren gidariari lagunduko diote".