Aurtengo urtarrilaren amaieran, auzoan Martxoaren 8aren bueltan lanketa berezia egiteko asmoz, Judimendiko hainbat emakume biltzen hasi ziren. Alde batetik, "auzoko emakumeon* artean espazio seguru eta atsegina sortzeko beharra" sentitu zuten. Bestetik, Euskal Herriko Mugimendu Feministak zaintzaren inguruan eta greba orokor batera bidean martxan jarritako dinamikaren parte izan nahi zuten.
Emakume Langilearen Nazioarteko Egunean, bi ekimen antolatu zituzten: zaintzen inguruan hitz egiteko solasaldia eta manifestaziora auzotik elkarrekin joateko deialdia, "guztion artean josi genuen oihal erraldoi batez lagunduta".
Egun horietan ereindako haziak sustraiak bota ditu, Judimendiko Emakumeon Sarea* sortuta; auzo dinamikari eutsi eta zabaltzen jarraitu nahi dute orain. Horregatik, hainbat bileraren ostean, auzoko emakumeei zuzendutako egitarau bat antolatu dute datozen asteetarako:
- Maiatzaren 19an, ostiralean, 17:00etan Judimendiko Parkean: Emakumeen* arteko auzo merienda eta gehiago. Hasieran, zaintzaren inguruko hausnarketa bat egingo dute, partaide guztien artean zaintzaren inguruko aldarrikapen eta esaldiak sortuz. Ostean, askari goxoa eta Lumina taldearen kontzertu akustikoa.
- Ekainaren 8an, ostegunean, 17:30ean Judimendiko gizarte etxean: Mahai-ingurua: Zaintzak erdigunean. Zergatik Greba bat? Umeen zaintza zerbitzua egongo da.
- Ekainaren 14an, asteazkenean, 18:00etan Judimendiko Auzo Elkartean: Asanblada irekia: Greba Feminista Orokorra Judimendin
- Ekainaren 20tik uztailaren 6ra, Judimendiko gizarte etxean: Erakusketa: Judimendiko Emakumeak* Sareak Josten
EGITARAUA
