Gaur arratsaldean abiatuko da Komedialdiaren hirugarren edizioa, eta, igandea bitartean, hiriko bazter ezberdinetan, bakarrizketa, antzezlan, hitzaldi eta kale ikuskizun ugarirekin gozatzeko aukera zabala izango dute gasteiztarrek. Aurtengoan, Ikusten dena… Eta han dagoena. Ikusezinaren indarra izenburupean, komediaren munduan ikusezin bihurtutako lanbideak omendu nahi ditu umorearen garrantzia nabarmentzea bilatzen duen jaialdiak.
Europa biltzar jauregian, 19:00etan, abiatuko da aurtengo jaialdia eta Kaitin Allende kazetari eta umoregilearen esku geratuko da ekitaldiaren gidaritza. Gaurkoan, Naiara Lopez de Munain kazetariak Raul Diaz gidoilaria elkarrizketatuko du jendaurrean, eta ostean Txilin hotsak izeneko antzezlan laburra eskainiko dute Ane Gebara eta Josune Velez de Mendizabalek.
Datozen egunotan, bazter ezberdinetan egitarau zabala prestatu dute antolatzaileek, "umore onak eskaintzen dituen onurak herritarrek ere gozatzeko aukera" izan dezaten.