Igandeko 17:00ak aldera, norbanako batek Larrialdi Zerbitzuei jakinarazi zien Gasteizko etxebizitza batean aita eta seme baten arteko eztabaida bat gertatu zela, eta azken horrek osasun laguntza behar zuela. Ertzaintza eta Osakidetzako baliabideak bertaratu zirenean, biktimak ustez labana batekin eragindako saihets-zauria zuela baieztatu zuten.
Adin txikiko semea Txagorritxu ospitalera joan zen senideekin batera. Bitartean, beharrezko informazioa jaso eta gero, ertzainek egiaztatu zuten ustezko erasotzailea, 49 urteko aita, gertakarien etxebizitzan zegoela. Negoziazio labur baten ostean, bertan atxilotu egin zuten, arma zuriz egindako lesio larrien ustezko delitu bat egotzita, etxeko indarkeriaren esparruan.
Atxilotua ere ospitalera eraman behar izan zuten, medikamentu gehiegi hartu zituela egiaztatu ostean. Une honetan, epailearen esku uzteko zain daude. Biktimak, berriz, ospitalean jarraitzen du, arriskutik kanpo.