Gazte Euskaltzaleen Sareak, unibertsitateko euskara taldeek eta Ikama ikasle antolakundeak deituta, eta euskalgintzako eragile nagusien atxikimenduarekin, Gasteizko ikasleek ere bat egin dute ostegun honetan Bilbon, Donostian eta Iruñean hezkuntza euskaldun baten alde deitutako mobilizazioekin. Arabako hiriburuko manifestazioaren kasuan, 12:00etan hasi da EHUko Campuseko Elurretatik.
Manifestazioaren amaierako ekitaldian, kezkatuta agertu dira "gure hizkuntzaren egoerarekin, euskaraz bizi nahi dugunon egoerarekin, euskararen aurka hartutako erabaki judizialekin eta euskarak pantailetan duen presentzia murritzarekin". Baina, bereziki, euskaraz ikasteko eskubidea "behin eta berriz urratzen" ari dela salatu dute.
"Euskaraz bizi nahi dugunon aurkako oldarraldi politikoak, juridikoak eta mediatikoak ez du etenik. Gure belaunaldiak gainditutzat zituen diskurtso eta jarrera euskarafoboekin bizi gara egunero. Euskara ez da aurrera joango, aurrera eraman behar da, eraman behar dugu; guk, guztiok", adierazi dute.
Horren guztiaren aurrean, lau eskakizun nagusi mahaigaineratu dituzte "hezkuntza prozesua euskalduna" izan dadin: irakasle eta langile euskaldunen kontratazioa %100ean bermatzea; erabiltzen diren eduki guztiak euskaratuta egotea; hezkuntza eremu linguistikoa osotasunean euskalduna izatea; eta, funtsean, Euskal Herrira egokitutako "hezkuntza sistema propioa" izatea.
"Hezkuntza euskaraz izan behar da, eta izango da", aldarrikatu dute. Eta horretarako, "herri aktibaziorako eta instituzio eta agintariek ardura hartzeko" dei egin dute, baita "euskara aurrera eramateko hizkuntza politika eraginkorrak" exijitu ere. "Guztion artean lortuko dugu iraganeko hizkuntza bihurtu nahi duten hori etorkizunekoa izatea".