Guraso elkarteak, auzoetan euskaraz eragiteko prest

Giuliana Preciado Cuero 2023ko mar. 16a, 14:00

Salburua eta Zabalgana ikastetxeetako guraso elkarteek parte hartu dute aste honetan Eragiteko janzten jardunaldien aurtengo hirugarren saioan: Guraso elkarteak, auzoak euskaraz saretzen.

Aintzira Salburua ikastetxeko ikasleen guraso elkarteak eta Mendibea Zabalgana BHIko ikasleen guraso elkarteak parte hartu dute Eragiteko janzten jardunaldien III. edizioko hirugarren saioan, GEU Elkarteak dinamizatuta.

Auzoetako euskaltzaleak, sarri, ikastetxeetako guraso elkarteetan ezagutzen dute elkar, eta bertatik eragin nahi izaten dute auzo euskaldunagoak lortu ahal izateko. Zer nolako taldeak topatzen dituzte? Zeintzuk izaten dira ekimenak? Nola antolatzen dira? Bestalde, auzoan izaten dira antzeko helburuen inguruan ari diren bestelako elkarte, talde edo erakundeak. Zer harreman izaten dute haien artean? Sortzen al dira lankidetzarako aukerak? Zer ematen die elkarlanean jarduteak?

Saio honetan Gasteizen aurrera eramandako esperientzia eredugarriak ezagutu ditugu. Datozen egunetan gaurko saioaren bideoa ikusgai izango da ALEAren webgunean, eta saioak guztiak bideoan ikusteko aukera izango da, saio bakoitzetik egun batzuen burura.

Eragiteko janzten jardunaldiak

Martxan da Eragiteko janzten, Arabagara, GEU elkartea, Lazarraga, ALEA eta Euskaltzaleen Topagunearen ekimenez. 2021ean jarri zuten hazia, eta, 2022an eragiten jarraitzeko asmoa berretsi ostean, aurten ere itzuli egin dira jardunaldiak. Gasteizko euskaltzaleen gogoetarako gune eta une bat da, esperientziak partekatu eta aberasten jarraitzeko.

Hirugarren edizioa, lau hilabetez luzatu beharrean, otsailean eta martxoan izango da, hil bakoitzaren 14an eta 28an; lau saioak asteartetan izango dira, 18:30ean. Eta Oihaneder Euskararen Etxerik edota Gasteiz Antzokirik ez dagoenez, Montehermoso Kulturunean egingo dira.

Saioen zein izen-ematearen inguruko xehetasun guztiak Euskaltzaleen Topagunearen webgunearen atal berezian aurki daitezke.

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide