SOS Hockey plataformak deituta, dozenaka lagun elkartu dira igande eguerdian Gasteizko Andre Maria Zuriaren plazan. Linea hockeyan jokatzeko instalazio egokiak eskatu dituzte protestan, kirol honetan parte hartzen duten guztientzako moduko pistak; 300 bat lagun ari dira gaur egun. Hockey ekipamendua soinean, elkarretaratze ikusgarria egin dute plazan.
Olaranbeko pistan jokatzen dute, baina "eskas" geratu da, plataformako kideek azaldu duten moduan. Pista horrek dituen gabeziak konpondu eta egokitu, eta beste bat ere egiteko eskatu diote Gasteizko Udalari. Esan dutenez, 40 lagun ere aritu izan dira batera entrenatzen, eta txiki geratzen da instalazioa. Hori, gainera, jende berria erakartzeko oztopoa dela nabarmendu dute. Une honetan, besteak beste, Dinosdevi, Sumendi, Muskerrak, Street Hockey eta Dragons taldeak ari dira bertan.
Sare sozialetan protesta zabaldu ostean, Gasteizko Udalak aferari konponbide bat emango diola erantzun du, baina "zain" jarraitzen dutela esan dute kirolariek. Erantzun bat adosteko asmoz, hilaren 20an izango dute bilera.