Espainiako Poliziaren infiltratu batek lau egun igaro zituen Errekaleor auzoan

Erredakzioa 2023ko ots. 1a, 11:00
Avilako polizia eskolan 2019an, eta 2020 eta 2021 arteko argazki bat. / Argazkia: LA DIRECTA

La Directa hedabide katalanak argitara atera du hiru urtez Bartzelonako mugimendu sozialetan infiltratuta izandako Espainiako Poliziaren agente baten kasua. Ikerketaren arabera, lau egunez ibili zen Errekaleor auzo okupatuan.

Espainiako Poliziaren agente batek hiru urte eman ditu Bartzelonako mugimendu sozialetan infiltratuta, 2020tik 2023ra bitartean. Horretarako, "harreman sexu-afektibo instrumentalak" mantendu zituen bertako hainbat emakumerekin, herri mugimenduetara hurbildu eta horietatik informazioa lortzeko helburuarekin.

Aste honetan, La Directa hedabide katalanak atera du kasua argitara. Bartzelonako aktibisten aurkako antzeko bigarren espioitza kasua da, edo, behintzat, La Directak ikertu eta argitaratu duen bigarrena.

Gemma Garcia, Jesus Rodríguez eta David Bou kazetarien ikerketaren arabera, infiltratua Bartzelonako Sant Andreu de Palomar auzora iritsi zen 2020ko ekainean, Daniel Hernandez Pons ezizena erabiliz eta Mallorcako gazte bat zela esanez. Antza denez, hiru urtez garatutako espioitza operazioa Espainiako Barne Ministerioaren agindupean egin zen.

Erreportaje nagusiarekin batera, Unes jornades al País Basc, trampolí cap a Madrid artikulu osagarria kaleratu du hedabide katalanak, eta ARGIA hedabideak xehetasun guztiak jaso ditu euskaraz.

Bertan argitaratutako informazioaren arabera, D.H.P. polizia infiltratua Gasteizko Errekaleor auzoan ibili zen lau egunez. Izan ere, 2021eko irailaren 16tik 19ra bitartean, Topaketa Libertarioak antolatu zituzten bertan, Badajozeko La Algarroba Negra zentro sozialari laguntzeko. Infiltratuak ere parte hartu zuen, Barztelonako La Cinétika zentro sozialaren izenean, Espainiako Estatuko beste hainbat kolektiboko kideekin batera.

"Errekaleorreko jardunaldietara joan aurretik, azken momentuan apuntatu zen, nahiz eta erasoen aurkako gida bat aurkeztera gindoazen, non berak ez zuen parte hartu", azaldu dute La Cinétikako kideek La Directa hedabidean. Besteak beste, arropa eta materiala erosi zuen Errekaleorren, eta orduz geroztik leku ugaritan jantzi zituen.

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide