Ostiral honetan, hilaren 16an, 18:30ean Venezuela kaleko 10. zenbakian, Laneko Autodefentsa Sarea (LAS) aurkeztuko du Gasteizko Kontseilu Sozialistak.
"Ez dira garai samurrak proletariotzarentzat. Gerra etengabeak, bizitzaren garestitze izugarria, ingurumenaren suntsipen progresiboa, langileriaren kontrolerako neurrien gogortzea... Erro komuna duten gertakariak dira horiek, gizarte kapitalistaren krisiarenak, hain zuzen", dio LASek bere burua aurkezteko plazaratutako ohar batean.
Lan arloan ere "burgesiaren ofentsibaren ondorioak" nabariak direla uste dute, baita langileriak "zuzen-zuzenean" pairatzen dituela ere. "Ziurgabetasunak ezaugarritutako lan eredua ari dira ezartzen: soldataren jaitsiera, langabezia estrukturala, kontratu gabeko lanak, ordaindu gabeko lanorduak, lan jazarpena, kaleratzeak... Inpunitate osoz jarduten dute enpresari handiek zein txikiek, babes gutxien duten langileen eskubideak etengabe urratzen dituzte".
Horren aurrean, Kontseilu Sozialistak "lan esparruan antolakuntza eta borrokarako espazioak" garatu nahi ditu, "autodefentsa sozialista antolatzeko" helburuarekin. "Beharrezkoa ikusten dugu nagusien inpunitatearekin amaitzeko langileriaren defentsa eraginkorra bermatuko duen instituzio independienteak sortzea, Estatu Sozialistaren eraikuntzaren alde indarrak metatuz".
