Nazio mailako bi manifestazio deitu zituen Erraki Langile Kontrolpeko Espazioen Babes Sareak larunbatean, Gasteizen eta Iruñean. "Azken urteotan okupazioaren aurka hartutako neurri larriena" deritzoten legea bera salatzeaz gain, "orokorrean alderdi politiko guztiek okupazioaren kontrako ofentsiban betetzen duten rola" kritikatu zuten mobilizazioetan.
"Desalojo azkarrak zaurgarritasun egoera larriago batera kondenatzen du proletalgoa. Batetik, etxebizitza eskubidea urratzen duelako. Bestetik, gaztetxeak, zentro sozialistak edota zentro sozialak okupatzea ia ezinezko bihurtzen duelako", ohartarazi dute. Lege proposamenak dakartzan berrikuntza eta eraginen artean, 48 ordutan desalojatzeko baimena eta desalojoa agintzeko epaiketa saihestea eta "banketxeek, putre funtsek eta jabe handiek ere bide azkarra erabili ahal izatea" aipatu dituzte, "orain arte ez bezala".
"Ez da okupazioaren kontrako beste eraso bat, okupazioaren erabateko ilegalizazioa da, eta aurre egin ezean ondorio izugarriak izango ditu bai proletalgoarengan, baita mugimendu iraultzaile antolatuarengan ere", ohartarazi dute. "Bizitzaren garestitzearen aurrean, eta, beraz, bizi baliabideak eskuratzeko inoiz baino zailtasun handiagoak daudenean, burgesiak eskaintzen duen irtenbidea argia bezain gogorra da: beldurraren eta zigor mekanismoen gogortzearen bitartez, proletalgoa, egokituko zaion bizi eredu miserablera ohitzea".