Energiaren tarifen igoeraren aurrean, gas bidezko komunitate galdarentzako laguntza ekonomikoen deialdia ebatzi du Gasteizko Udalaren Ogasun Sailak, horren inpaktu ekonomikoa minimizatzeko. Guztira, 545 eskaera aurkeztu dituzte bizilagun komunitateek, eta horietatik, azkenean, 38ri ezezkoa eman die Udalak, eskakizunak betetzen ez zituztelako. Hortaz, guztira 507 eskaera onartu dituzte, eta orotara 3.068.490 euro banatuko dira; hasiera batean egindako aurreikuspenak (350 komunitate eta milioi bat euro inguru) baino askoz gehiago.
Azaroaren amaiera eta abenduaren hasiera artean ordainduko dira diru laguntza aitzindari horiek, administrazio izapide guztiak amaitu ostean.
Azkenik, guztira 33.306 familiari eragingo die neurriak; horietatik, 2.365 etxebizitza sozialak dira, eta 30.904 ez sozialak. Horrela, udal gobernuak beharra duten familia guztiengana iristeko konpromisoa bete nahi izan du, bereziki 2021ean egindako araudi aldaketaren ondoren azken baliabidearen tarifa eskuratu ezin duten komunitateko galdarak dituztenengana.