Baskoniari bere azken liga titulua eman zion jokalariak, Vildoza antolatzaile argentinarrak, jokalari askoren ametsa beteta NBAra eman zuen saltoa 2021ean. Gasteiz atzean utzita, eta kontratua eteteagatik Baskoniarekin zorra beregain hartu ostean, New York-era bidea hartu zuen jokalariak.
NBAn bere dohaiak erakusteko aukera gutxi izan du jokalariak tamalez. Hasteko denboraldi oso bat eman zuen geldi oinean ebakuntza egin ostean, eta Knicks taldeak bere eskubideak Milwaukeeri saldu zizkion, NBAn ohikoak diren "kromo-trukeak" eginda.
Hastear dagoen denboraldira begira jokatzeko aukera gutxi ikusten zuen jokalariak eta arrazoi horregatik azken asteotan Europara itzultzeko asmoaren berri eman dute zenbait iturrik. Hala izatekotan, Baskoniak omen du lehentasuna beste edozein talderen aurretik. Izan ere, NBAtik itzulerako bidea egitekotan Baskonia da jokalariak Europan aritzeko zituen eskubideen jabea.
Gainera, zenbait iturriren arabera jokalari eta Zurbaoko taldearen arteko harremana beti izan da nahiko estua eta Gasteizera etortzeko eragozpenik handiena Baskoniak egin zezakeen eskaintza ekonomiko ahula izan da. Jarraitzaile askok ilusioz bizi izan dituzte azken egunak eta jokalariaren itzulerarekin amestu dute.
Ordea, gaur arratsaldeko gertaerek egoera erabat irauli dute. Hasteko Belgradeko Izar Gorriak Vildozaren fitxaketa iragarri du sare sozialetan eta zaletu askok harriduraz hartu badute ere, "onartu" egin behar izan dute jokalaria beste talde batera joan izana. Sorpresa Baskoniak argitaratutako prentsa oharrak eragin du.
Izan ere, itxuraz, Baskoniak ez du mugimendu horren berririk izan eta jokalariaren gaineko eskubideen jabetzari ez ikusia eginez gauzatu da akordioa. Baskoniak gogor kritikatu du erabakia eta egoera publikoki salatu egin du argitaratutako komunikatu batean.