Azken urteetako migrazio mugimenduek eragin nabaria izan dute gure gizartean, eta, gaur egun, jatorri ezberdineko bizilagunei esker Euskal Herrian ehun hizkuntzatik gora hitz egiten da. Egoera berri horrek aberastasun kultural izugarria eskaintzen dio egungo gizarteari, baina era berean aniztasun hori kudeatzeko behar berriak ere sortu ditu.
Egoeraz jakitun, eta azken helburua euskararen biziberritzean pausuak ematen jarraitzea izanik, Euskaltzaleen Topaguneak aniztasun arloko proiektuak kudeatzen dihardu azken urteotan. Topagunearen ustetan, "euskara erabiltzea ohikoa eta erosoa" izango badira, jatorri eta hizkuntza ezberdinetako bizilagunen parte hartzea ezinbestekoa izango da.
Hala, Topaguneak Euskal Herrian bizi diren hizkuntza denak zaindu eta euskara denon kohesio hizkuntza izatearen alde lan egiteko konpromisoa azaldu du, eta helburu horrekin sortu du hain zuzen Auzoko proiektua; elkarrekin euskaraz komunikatuz, hizkuntza eta kultura anitzetako herritarron arteko harremanak sortzeko egitasmoa. Era horretan aurreiritzi eta uste okerrak gainditzea bilatzen dute sustatzaileek.
Azken hamarkadan, Auzoko programaren baitako sare horien bueltan ehunka herritar biltzea lortu dute, Euskal Herri osoko hamaika bazterretan. Topaguneak eskainitako tresna eta egitasmoak oinarri hartuta, familia, lagun artea, eskola eta beste zenbait eremutan proiektuak garatzea lortu da, eta bertan jatorri ezberdineko bizilagunei harrera egin zaie. Gainera, euskaraz komunikatzen laguntzeko tresnak ere eskaini zaizkie, eta orokorrean konplizitatea lantzea bilatu da.
Hitzaldi zikloa
Urte hauetan egindako bideari jarraituz, aurten Zubi bat euskaratik hitzaldi zikloa antolatu du Euskaltzaleen Topaguneak, lurraldeko txoko ezberdinetan. Urriaren 19tik azaroaren 10era bitartean, hitzaldiak izango dira aditu ezberdinen eskutik.
Araban, urriaren 24an egingo dute topaketa, Gasteizko Landatxo gizarte etxean, 18:30ean. Bertan Julia Shershneva EHUko irakasleak Aniztasun linguistikoa eta immigrazioa EAEn hitzaldia eskainiko du.
Shershnevak arrazakeria, xenofobia eta immigrazioa ditu ikerketa ildo nagusiak bere ikerlari lanean, eta integrazio linguistikoaren garrantzia azpimarratzen du egungo testuinguruan. Hortaz, atzerrian jaiotako pertsonek euskararekiko duten gertutasuna ulertzeko gakoak izango dira hitzaldian aztergai.