Hamabi egun baino ez dira falta Dazz Jazz jaialdiaren VII. ediziorako. Beste behin ere, Gasteizko jazz zaleek lehen mailako eskaintza batez gozatzeko aukera izango dute Vital Fundazioa Kulturunean, urriaren 19tik 23ra bitartean. Jaialdiaren antolatzaile Beñat Lasagabasterrek, Vital Fundazioko zuzendari Arantxa Ibañez de Opakuak eta Estibaliz Canto Kultura zinegotziak xehetasun guztien berri eman dute gaur goizean, Dazz klubean.
Guztira bost kontzertuk osatuko dute aurtengo programazioa, eta saio guztiak 20:00etatik aurrera izango dira. Asteazkenean, urriaren 19an, Leonor Watling, Leo Sidran eta Javi Peña Triok irekiko dute zikloa. Ostegunean, hilaren 20an, Iñaki Salvador eta Chris Kase izango dira oholtza gainean.
Ostiralean, hilaren 21ean, Jesse Davis Quartet laukotearen txanda izango da, eta larunbatean, hilaren 22an, berriz, Jorge Rossy, Bill McHenry eta Masa Kamaguchirena. Azkenik, igandean, hilaren 23an, Chano Dominguez Quartet taldeak itxiko du programa, Flavio Boltrorekin batera.
Sarrerak eta abonuak www.musikaze.net webgunean eros daitezke, eta abonuak webgunean bertan edo Dazz klubean, Aiztogile kaleko 60. zenbakian.
