Mercedesek Gasteizen duen fabrika handitzeko proiektuak urrats erabakigarria eman du gaur, Emilio Titos zuzendariaren eta Gorka Urtaran alkatearen arteko bilerarekin. Bertan, Alemaniako konpainiaren ordezkariak proposamen zehatz bat egin dio Udalari, V eta Vito klaseko furgoneta elektrikoak ekoizteko iragarritako 1.200 euroko inbertsioa bermatzeari begira.
Egungo instalazioak hego-ekialderantz handitzeko proiektuaren eskakizun nagusia 23,8 hektareako eremua okupatzea da, Zabalgana parkearen ondoan, Areatza kalea eta Mariturriko Bulebarra elkartzen diren eremuan; betiere, Eraztun Berdearen basoari eragin gabe.
Horretarako, Titosek Udalari eskatu dio bizitegi-sektore oso bat (Zabalgana auzoko 5B sektorea) industria erabilerarako bihurtzea. Aldaketa baimenduko balitz, bertan aurreikusitako 1.200 etxebizitza eraikitzeari utziko litzaioke.
Proposamenak aurrera egin ahal izateko, udal gobernutik (EAJ-PSE) kanpoko talde politiko baten babesa beharko luke osoko bilkuran. Gasteizko Udalak ohar batean azaldu duenez, gaur egungo instalazioak parean izanda fabrika handitzeko aukera bakarra litzateke hori.
