Gasteizko Esperantza kaleko Quiron Salud ospitaleko langile batzordeak —ELA sindikatuak ordezkatuta— hiru greba egun deitu ditu iraila amaieran, hilaren 27an, 28an eta 29an. Hitzarmen kolektibo berriaren negoziazioa "blokeatuta" dagoela salatu dute; apirilean hasi ziren elkarrizketak, eta enpresa batzordeak langile guztien KPIa bermatzea ezarri zuen gutxieneko baldintza gisa.
"Hitzarmen kolektiboak baldintza zaharkitu asko ditu, eta ezegonkortasuna eta behin-behinekotasuna bultzatzen ditu. Hala ere, nahiz eta Quiron taldeak 2020an 2.000 milioi euro inguru fakturatu, ez dago prest KPIri lotutako soldata igoera onartzeko", salatu du ELAk.
Horrez gain, plantillak "behin-behinekotasuna eta ezegonkortasuna, soldata txikiak, txandaka lan egiteagatik plusik ez, gaueko lanagatik eta jaiegunengatik plus barregarriak, gehiegizko lanaldia eta abar" jasaten dituela kritikatu du sindikatuak. Ondorioz, langileek kalera ateratzea erabaki dute, "bere lana aitortu dezaten".