Ikasturte berriarekin batera, bueltan da Gauekoak, 16 eta 30 urte bitarteko gazte gasteiztarrentzako aisialdi alternatiboa, hezitzailea eta osasungarria eskaintzea helburu duen udal programa.
Udazken-neguko denboraldia dator, eta horren barruan 27 jarduera eskainiko dituzte, irailetik abendura arte. Kultur eta kirol arloko jarduerak izango dira nagusi, eta sormena, euskararen erabilera, emakumeen ikusgarritasuna, irisgarritasunaren eta inklusioaren sustapena zein herritarren parte hartzea bultzatzea izango dute xede.
Denboraldiaren hasiera rock psikodelikoa oinarri duen Xperimental Fest jaialdiarekin iritsiko da irailaren 23an, ostiralean, Jimmy Jazz aretoan; bertan arituko dira Entropia, Wet Cactus, Cachemira eta Moundrag taldeak. Asteburu horretako larunbatean, berriz, Hiriko Game Changers jardunaldiaren txanda izango da, Santa Luziako Skate Parkean.
Ondoren, abendura bitartean, askotariko kontzertuak, kirol zein abentura jarduerak, tailerrak eta bestelako hitzordu asko izango dira: besteak beste, Euskarazko Irakurle Taldea, akroyoga, lindy hop, argazkilaritza, escape room bat, rap freestyle liga, La Lezeren jaitsiera, piraguismoa, azaleztapena, collage analogikoa, gorputz adierazpena, pintura, zinema eta antzerkirako makillajea eta FX karakterizazioa, zeramika, sexualitatea, Voluptatem zirku ikuskizuna...
Hiriko eragileekin elkarlanean, beste hainbat ekimen eramango dituzte aurrera: adibidez, ALEArekin batera antolatutako Oporklik! argazki-hizki lehiaketa eta erakusketa; edo III. Hizki Laburren Lehiaketa, Lazarraga Kultur Elkartearekin batera.
Irisgarritasunari bultzada
"Kolektibo guztien eta barne hartzen dituzten pertsona ororen parte hartzea bermatu eta bultzatzeko" asmoz, denboraldi honetan irisgarritasunari dagokionez aurrerapausoak egin nahi izan dute. "Hausnarketa baten ondoren ohartu gara hutsune bat dagoela, eta ez genuela gazte guztiek programazioetan eroso parte hartzeko aukerarik errazten", azaldu dute. Horregatik, behar izanez gero, laguntza eskatu ahal izango da jarduerak gauzatzeko, desgaitasun egoeran dauden pertsonek aisialdiaz gainerako pertsonen baldintza berdinetan gozatu ahal izateko.
Izen-emateak
Programazioaren erdia baino gehiago euskaraz izango da (kontsultatu Euskararen Agenda), eta jarduera guztiak doakoak dira; hala ere, horietako batzuetan beharrezkoa izango da aldez aurretik izena ematea, Gauekoak programaren webgunearen bitartez, 010 edo 945 16 11 00 telefono zenbakietara deituz, edo Gazteen Informaziorako Bulegoan. Gasteizko Udalaren webguneko atal berezian, jarduera guztien zerrenda eta horien inguruko informazio guztia daude ikusgai.
Jardueren zerrenda
- Irailak 23 ostirala:
Xperimental Fest jaialdia
- Irailak 24 larunbata:
Hiriko Game Changers: musika, lantegiak eta erakustaldiak
- Irailak 29 osteguna:
Euskarazko irakurle talde gaztea (I): Ez erran inori (Maddi Ane Txoperena Iribarren)
- Irailak 30 ostirala:
Lindy Hop hastapen lantegia eta jam session
- Urriak 1 larunbata:
Arroila-jaitsiera, La Leze
Mugimendua eta kolorea: argazkilaritza eta errebelatzea
- Urriak 7 ostirala:
Sexualitatea bizitzen
- Urriak 15 larunbata:
Piraguismoa Uribarri-Ganboan
- Urriak 27 osteguna:
Euskarazko irakurle talde gaztea (II): Ene herri txikia (Gael Faye)
- Azaroak 4 ostirala:
Voluptatem, zirku ikuskizuna Kaput konpainiaren eskutik
- Azaroak 5 larunbata:
Koadernaketa
- Azaroak 11 ostirala:
Street Scape - Kristalezko oihana
- Azaroak 12 larunbata:
Fine Art argazkilaritza
- Azaroak 18 ostirala:
Akroyoga Moonkey Pills-ekin
Keramika lantegia
- Azaroak 19 larunbata:
Collage analogiko tailerra
- Azaroak 24 osteguna:
Euskarazko irakurle talde gaztea (III): Ez dakit zertan ari zareten (Ana Malagon)
- Azaroak 26 larunbata:
Gorputz adierazpen eta pintura tailerra
- Abenduak 10 larunbata:
Zinema eta antzerkirako makillajea eta FX karakterizazioa
- Abenduak 15 osteguna:
Euskarazko irakurle talde gaztea (IV): VHS (Oier Guillan)
- Abenduak 23 ostirala:
Gasteizko Freestyle League