Euskara zuri deika lelopean, martxan da Gasteizko IKA euskaltegien matrikulazio kanpaina. Irailaren 1etik 30era bitartean izena emateko informazio guztia IKAren webgunean dago ikusgai, baita deskontu zein dirulaguntzen inguruko xehetasunak ere.
2022-2023 ikasturteko eskaintza aurrez aurrekoa (egunero bost, hiru edo bi ordu; astean lau, hiru edo bi egunetan; edo astean behin), telematikoa (egunero bi ordu) edo autoikaskuntzakoa (190 ordu) izango da.
"30 urtetik gora daramatzagu IKAn, euskalduntzen. Irakasle gehienek 20 urtetik gora daramatzate euskara eskolak eta trebakuntzak ematen. Hala ere, egunero gaurkotzen dute euren jarduna", azpimarratu dute. "Metodologia komunikatiboa dugu oinarri. Helburua komunikatzea izango da beti, euskaraz hitz egin, esaten dizutena ulertu, idatzi eta irakurritakoa ulertzea. Eskoletan erabiltzen dugun materiala geuk sortzen dugu: material propioa erabiltzen dugu. Horretarako, lantalde bat aritzen da modu jarraian materiala gaurkotu, eta, behar bada, sortzen".