Larrialdi zerbitzuek pertsona bat artatu dute gaur eguerdian Gasteizko Frantzia kalean, leiho batetik amildu ostean. Udaltzaingoa, Ertzaintza, suhiltzaileak eta osasun zerbitzuak bertaratu dira ezbeharraren lekura, eta olana batekin estali dute ingurua.
Lekukoen arabera "gizon gazte bat izan da" leihotik amildu dena. Ertzaintzak ALEAri baieztatu dio 14:20an gertatu dela ezbeharra, eta osasun zerbitzuek pertsona bat eraman dutela Txagorritxuko ospitalera.
Suizidio saiakeren inguruan jarraitzen duten protokoloari jarraiki, ez dute argitu lagun horrek bere buruaz beste egin nahi izan ote duen, norbaitek bultzatu duen ala nahigabean erori ote den. Eroritako lagunaren osasun egoeraren inguruko daturik ere ez dute momentuz ezagutarazi.