'Kazetaritza, bertatik bertara' jardunaldien VIII. edizioa ospatuko da abuztuaren 29tik aurrera, bi urteko etenaldiaren ondoren. Hitzaldiak, mahai-inguruak, pelikula-emanaldiak eta aire zabaleko erakusketa grafiko bat jasoko ditugu aurtengo egitarauak. Aurtengo edizioan, gainera, nazioarteko gatazkak izango dira nagusi: Errusia eta Ukrainaren arteko gerra, krisi klimatikoa, prentsa-askatasuna edota Afrikako errealitatea, esate baterako.
Saio hauen bitartez, gaurkotasun gaiak landuko dira, nazioarteko esperientzia duten kazetari eta adituen eskutik, herritar guztiei irekitako eztabaida eta gogoeta espazioak sortzeko asmoz. Gatazka eremuetan esperientzia duten kazetariak, foto-kazetariak, korrespontsalak eta beste zenbait aditu egongo dira parte-hartzaileen artean. Horien artean izango dira Mikel Reparaz, Xabier Aldekoa, Maria Garcia de la Fuente, Carmen Claudin, Manu Brabo, eta Ana Fuentes, besteak beste.