Tuvisako administrazio-kontseiluak gaur goizean onartu du 12 urtetik beherakoek doan bidaiatzea Gasteizko autobusetan; neurriak 28.000 bidaiariri eragingo die. Azaldu dutenez, neurri honek familiei ekarriko dizkien abantailez gain, hiriko trafikoaren puntu kritikoetako bat ere arintzea ahalbidetuko du: ikastetxeetarako sarrerak eta irteerak.
Neurria behin betikoa izango da, eta ez aldi baterakoa. Tuvisa lanean ari da doakotasuna lehenbailehen martxan jartzeko, datozen hilabeteetan. Orain teknikoki aztertzen ari dira zein den horretarako formularik onena. "12 urtetik beherakoek Tuvisan doan bidaiatu ahal izango dute laster. Neurri hau 28.000 bidaiarirentzako onuragarria izango da, behin betikoa izango da, eta garraio publikoaren erabilera sustatzea du helburu", azaldu du Tuvisako presidente eta Mugikortasuneko eta Espazio Publikoko zinegotzi Raimundo Ruiz de Escuderok.