Aurtengo azken kontzertuan, Jazz jaialdian ohikoa ez den publikoak bete zuen Mendizorrotzeko kiroldegia. Aurreko egunetan Snarky Puppy, Robert Glasper edo Arturo Sandoval jaso ostean, Mendizorrotzeko oholtzak hip hop doinuei egin zien tokia Kase.O raperoaren eskutik.
Gehiegizko beroa ez zen oztopo izan, eta Javier Ibarra aragoiarrak aurreko egunetan erdi hutsik geratu ziren harmailak ia erabat betetzea lortu zuen. Ikusmina pizten du Violadores del Verso taldeko MC izandakoak, eta doan tokira doala, atzetik izaten ditu jarraitzaileak. Are gehiago, berriki datorren udaberrian eszenatokiak uzteko asmoa duela iragarri ostean.
Jazz Magnetism lanak hamar urte bete dituen honetan, Gasteizko Jazz jaialdiak tokia egin dio jazza eta hip hop doinuak lotzen dituen lanari. Esker oneko agertu zen Javier Ibarra Jazz jaialdiko antolatzaileekin, eta jaialdian egotea bere ibilbideko lorpenen artean kokatuko duela esatearekin batera, Iñaki Añuari eskaini nahi izan zion kontzertua.
Kontzertua jazz doinuekin hasi bazuen ere, azkar berotu zen giroa eta ikusleak aulkietatik mugitzea lortu ostean, rap abestiak izan ziren nagusi: Violadores del Versoren Ballantines, SFDK-ko Zaturekin elkarlanean egindako Ringui Dingui edota Kase.O-ren lanik berrienetakoa den Tiranosaurus Rex, esaterako.
