Gasteizek komun publiko berri bat izango du hiriaren erdialdean, Florida parkean. Horren bitartez, eta 66.638,79 euroko inbertsioa eginda, Gasteizko Agenda prozesu parte-hartzailearen bitartez herritarrek egindako eskaerari erantzun nahi dio Udalak.
Egunotan hasi dira azpiegitura hori instalatzeko obrak, eta lehenbiziko lanak WC modulua kokatuko den eremua egokitzeko izango dira. Instalazio berria komun autogarbitu, misto, irisgarri eta unibertsal bat izango da, eta modulu higienikoak hiru plazako kanpoko pixatoki bat izango du ere.
Udalak azpimarratu du hiriak dagoeneko baduela pixatoki publikoen sare bat: gaur egun, zortzi daude kaleetan (gehienak 24 orduko ordutegiarekin), eta, horrez gain, gizarte etxeetan beste hamalau puntu daude. Florida parkeko instalazioaz gain, Mugikortasun eta Espazio Publikoaren Sailak beste hiru jarriko ditu datozen hilabeteetan hiriburuko hainbat puntutan.