Hiru egun barru, nazioarteko 2.500 triatleta bilduko dira Gasteizko Ironman lasterketan. Udalak eta probaren antolatzaileek aurtengo edizioko Finisher kamiseta eta domina aurkeztu dituzte, "green" logo berri batekin, hiriaren balio jasangarriak balioan jartzeko: "Hiri honek duela urte askotik kirolaren aldeko eta Ironmanaren moduko lehen mailako kirol ekitaldiak ekartzeko apustua egiten du; hiriak dena ematen du, eta gasteiztarrok kirolarekin guztia ematen dugu", azpimarratu du Gorka Urtaran alkateak.
Igandeko lasterketaren lehen zatia igeriketakoa izango da: Uribarri-Ganboa urtegian 3,8 kilometro egin beharko dituzte igerian.
Ondoren, bizikleta hartu eta 180,2 kilometro egingo dituzte horren gainean, hiriburuaren inguruan dauden herriak zeharkatzen dituen zirkuituari hiru itzuli emanez, eta, tarte batean, Done Jakue Bidearen zati bat eginez.
Proba amaitzeko, 42,2 kilometroko maratoia egin beharko dute korrika, Gasteizko erdigunean, Erdi Aroko hirigunearen inguruan, Plaza Berriko helmugara iritsi aurretik.
Maila goreneko kirol ekitaldi honetan parte hartzeko izena eman dute dagoeneko 2.500 triatletak, eta atzerriko presentzia handia izango da aurten. Kirolari horietako batzuek urrian Kailua-Konan (Hawaii) jokatuko den Ironman probaren munduko txapelketarako plazak eskuratuko dituzte.
