Joan den ostiralean, Santovenia de Pisuergan (Valladolid), tiroketa bat jazo zen Guardia Zibilaren eta bizilagun bat hil ondoren gotortu zen gizon baten artean. Pedro Alfonso Casado teniente koronela, operazioaren arduraduna, negoziatzaile lanetan aritu zen, bahitutako beste pertsona bat askatzeko.
Gertakarien erdian, 22 kalibreko errifle batekin emandako tiro batek kaskoa zeharkatu eta buruan zauritu zuen. Larriki zaurituta, urgentziazko ebakuntza egin zioten, eta gaur arte ospitaleratuta izan da Valladolideko Ospitale Klinikoan. Astearte honetan hil egin da.
50 urteko guardia zibila, Perico ezizenarekin ezaguna, Gasteizen jaio zen 1972an, baina jaio eta gutxira bere familiarekin Sahagunera (Leon) joan zen bizitzera. 25 urteko ibilbidea zuen Guardia Zibilaren elite-unitateetan. Zaragozako Akademiatik 1998an atera zen, eta hurrengo urtean Landa Ekintzako Taldeetan (GAR) hasi zen. Urtebete geroago, GEOen baliokide den Esku-hartze Unitate Berezian (UEI) sartu zen. Bi hamarkada eta erdi hauetan, besteak beste, ETAren aurkako operazioetan parte hartu zuen.