Gizon bat atxilotu dute emakume bat bortxatu eta indarkeriazko lapurreta egiteagatik

Erredakzioa 2022ko uzt. 2a, 11:30
Eraso matxisten aurkako mobilizazio bat. / ALEA

Ertzaintzak 41 urteko gizon bat atxilotu du Gasteizen, etxebizitza batean emakume bati sexu erasoa egitea eta indarkeria erabiliz lapurtzea egotzita, horretarako "mataleoiaren" teknika erabiliz.

Ostegun honetan, emakume bat Gasteizko ertzain-etxera joan zen, ezagutzen zuen gizon batek, etxera lagundu ostean, bere borondatearen aurka eta mehatxupean berarekin sexu harremanak izatera behartu zuela salatzeko.

Biktimaren testigantzaren arabera, ondoren, ustezko erasotzaileak bere gerriko poltsa bat lapurtu zuen —kutxazain batean lehenago ateratako diru kopuru handi batekin—, eta, borrokan "mataleoiaren" teknika erabiliz —konorterik gabe utzi arte itotzea—, etxetik alde egin zuen.

Ertzaintzak ikerketa abiatu eta ustezko egilea identifikatzea lortu zuen. Polizia-aurrekariak dituen 41 urteko gizonezkoa ostiral arratsaldean atxilotu zuten, sexu erasoa eta indarkeriazko delituak egotzita. Ertzain-etxean beharrezko eginbideak amaitu ondoren, atxilotua epailearen aurrera eraman dute gaur, larunbat goizeko lehen orduan.

Indarkeria matxistarekin lotutako Arabako berriak. Tratu txarrak pairatzen badituzu edo kasuren bat ezagutzen baduzu, deitu telefono hauetako batera: 900 840 111 (EAEn) edo 016 (Estatu osoan); doakoak dira eta ez dute arrastorik uzten fakturan, baina bai telefonoan. Beraz, ez ahaztu ezabatzea. 

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide