Hamazazpi egun barru, uztailaren 10ean, Ironman triatloi lasterketa itzuliko da Gasteizera. Lehen zatia igeriketakoa izango da: Uribarri-Ganboa urtegian 3,8 kilometro egin beharko dituzte igerian; ondoren, bizikleta hartu eta 180,2 kilometro egingo dituzte horren gainean, hiri inguruan dauden herriak zeharkatzen dituen zirkuituari hiru itzuli emanez, eta, tarte batean, Done Jakue Bideko zati bat eginez; proba amaitzeko, 42,2 kilometroko maratoia egin beharko dute Gasteizko erdigunean, Erdi Aroko hirigunearen inguruan, Plaza Berriko helmugara iritsi aurretik.
Maila goreneko kirol ekitaldi honetan parte hartzeko izena eman dute dagoeneko 2.500 triatletak, eta atzerriko presentzia handia izango da aurten. Kirolari horietako batzuek urrian Kailua-Konan (Hawaii) jokatuko den Ironman probaren munduko txapelketarako plazak eskuratuko dituzte.
"Green" logoa
Aurtengo edizioan, gainera, Gasteizko Ironmanak logotipo berria estreinatuko du: triatloiaren irudi tradizionala egokitu eta berdea izango da, hiriaren "green" izaera eta jasangarritasunarekiko konpromisoa erakusteko.