Gasteizko Udalaren, Arabako Aldundiaren eta Eusko Jaurlaritzaren laguntzarekin, Gasteiz On merkatarien elkarteak mugikorrera deskargatzen den eta urtebeteko epean hiriko establezimendu batean edo gehiagotan truka daitekeen opari-txartel birtuala jarri du abian. Oparitu Gasteiz izena du ekimenak, eta tokiko merkataritza sustatzeko asmoz jaio da.
Gasteiz On elkartearen webgunean dagoeneko lortu daitekeen txartelak hiri osoko 250 saltoki, taberna, jatetxe eta bestelako establezimendu baino gehiagotan produktuak edo zerbitzuak erosteko aukera emango die erabiltzaileei. Erosketa horiek denda fisikoetan edo negozio bakoitzaren webgunean egin ahal izango da.
Mugikorreko ordainketa sistemaren bidez funtzionatzen du, beste edozein sistemak bezala. Honako hauek dira jarraitu beharreko urratsak:
- Gasteiz On webguneko atal berezira sartu.
- Bertan, 30, 50 edo 100 euro aukeratu.
- Deskarga kode bat jasoko duzu emailean, opariaren hartzailea bidali ahal izateko.
- Onuradunak urtebeteko epea izango du erosketa egiteko, kodea datafonora gerturatuz.
Arropa, osagarriak, elikagaiak, oinetakoak, kirol produktuak, loreak, dekorazioa, teknologia, kultura eta beste dozenaka produktu topa daitezke atxikitako establezimenduen zerrendan.