Umami talde gasteiztarrak irabazi du Gaztea Cover lehiaketa

Erredakzioa 2022ko eka. 15a, 11:20
Umami laukote gasteiztarra saria jasotzen, Gaztea Cover finalean. / Argazkia: EITB

Iseo & Dodosounden Chan Chan eta Amy Winehousen Valerie abestien bertsioekin, Umami talde gasteiztarrak irabazi du EITBren Gaztea Cover bertsio lehiaketa.

Albiste onak Arabako musika eszenarako. Etorkizun oparoa dago lurraldean, zalantzarik gabe, baina noizean behin beharrezkoak dira horren adierazgarriak. Eta Gasteizko Umami musika taldeak EITBk antolatutako Gaztea Cover bertsio lehiaketaren finala irabazi du astearte honetan.

Gasteizeko Foruen Plazan hamar lehiakideren artean jokatutako bigarren finalerdian, Iseo & Dodosounden Chan Chan kubatar abestiarekin —jatorrizko bertsioa Compay Segundorena da— sailkatu ziren gasteiztarrak. Final handira, berriz, Amy Winehousen Valerie kantarekin joan dira. Finalista guztien bertsioa entzunda, epaimahaiak bi aukeratu ditu superfinalerako: Umami eta Danel Sarasua.

Epaimahaiaren erabakiz, laukote gasteiztarrak irabazi du lehiaketa bera eta 2.000 euroko saria. Bestalde, entzuleen Saria Uxue Kerejetak irabazi du.

Kontserbatorioan ezagutu zuten elkar Umami taldeko lau kide gazteek, eta Gaztea Cover lehiaketa irabazteak behar bezalako bultzada emango die bidea egiten jarraitzeko. Laster iragarriko dituzte beren lehen kontzertuak.

Final handiko sari banaketa

 

Iseo & Dodosound - 'Chan Chan'

 

Amy Winehouse - 'Valerie'

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide