Astearte honetan hasi eta ekainaren 3ra arte luzatuko da Armentumeko II. Kultur Aste Erromatarra, Zabalgana Batuz auzo elkarteak Udalaren, Aldundiaren Arkeologia Sailaren, Arabako Arkeologia Institutuaren eta Vital Fundazioaren laguntzarekin antolatutako ekimena.
Mariturri sektoreko aztarnategi erromatarraren garrantzia nabarmendu nahian, herritar guztientzako jarduera kultural eta sozialak izango dira egunotan. "Erromatarrek aztarna aipagarria utzi zuten gure hirian, eta horietako bat da, hain zuzen ere, Mariturriko aztarnategia", azpimarratu du Estibaliz Canto Kultura zinegotziak. Bere aldetik, Alain Larreina Zabalgana Batuz elkarteko kideak nabarmendu du ekimena "bizilagunen sozializaziorako eta topaketarako aukera" dela, "ondarearekin eta historiarekin lotutako baliotik" haratago.
Jardueren artean, besteak beste, honakoak izango dira: erakusketa ibiltaria Mariturriko eskoletan eta saltokietan, tailerrak, barraka ekologikoak, kaleko antzerkia, parkourreko jarduerak, ikuskizun akrobatikoak, birsorkuntza historikoak, familia osoarentzako ginkana, dokumentala, desfile bat eta amaierako kalejira.
