Martxan da Komedialdia Gasteizko Umore Jaialdia, eta gaurtik igandera bitartean umoreari lotutako ekimenez beteta egongo da hiria. Astearte honetan, egitarauaren barruan, El Mentirón: Gasteizko XIX. mendeko album baterako orriak izeneko erakusketa inauguratu dute Bibat Museoko Bendaña Jauregiko patioan.
Erakusketak Ricardo Becerrok El Mentirón (1868-1869) egunkariko zuzendaritzan egindako hogei bat marrazki satiriko biltzen ditu. Argitalpena "munduko egunkari ilustratu merkeena" bezala ezagutzen zen, eta igandero Arabako ohiturei buruzko artikulu sorta bat helarazten zuen Gasteizko etxeetara.
Ander Gondra izan da erakusketaren komisarioa. Izan ere, ikerketa sakon bat egin zuen XIX. mendeko Arabako kultura panoramako pertsonarik garrantzitsuenetako bat izandakoaren inguruan, 2021ean Sans Soleil Ediciones argitaletxeak kontakizunen antologia islatzen zuen liburu bat (Historias Increíbles. Antología de relatos de Ricardo Becerro de Bengoa) argitaratu ostean. Ikerketa egiteko, beharrezkoa izan da Vital Fundazioaren eta Sancho el Sabio Fundazioaren laguntza.
Erakusketa irailaren 25era arte bisitatu ahal izango da. "Erakusketa bere garaiko umorearen, eztabaida eta ezkutuko interesen eta garai hartan bizi zen egoera politiko nahasiaren adierazle ezin hobea da", adierazi du Erdi Aroko Araba elkarteak, inaugurazio ekitaldian.
