Uztailaren 12tik 17ra bitartean ospatuko da Gasteizko Jazz Jaialdiaren 45. edizioa. 67 egun baino ez dira falta hasteko, eta antolatzaileek azken iragarpen batekin itxi dute programazioa, aurtengo edizioari amaiera zoragarria emateko: Kase.O, Jazz Magnetism (2011) album enblematikoaren hamargarren urteurreneko biraren barruan.
Zaragozako MCa rap musikaren artista garrantzitsuenetako bat da, eta 2011. urtean jazzarekin eta hainbat jazz musikarirekin bat egin zuen disko horrekin. Javier Ibarrak (Kase.O-ren benetako izena) benetako fenomeno musikala eragin zuen, eszena astinduz eta rap musikarien artean beste estiloekin esperimentatzeari ateak irekiz.
2021ean, proiektuaren hamargarren urtemuga ospatzeko, berriz ere bildu ziren Kase.O, Dani Comas, Dani Dominguez, Hugo Astudillo (Escandaloso Xposito), Juan Pablo Balcazar eta Juan Berbin. Bira Mendizorrotzako kiroldegira iritsiko da uztailaren 17an, soinu eta erritmo berriak gehitzeko Jazz Jaialdiak egindako apustu gisa.
Espainiako Estatuko hip hop kulturaren mito bat da Kase.O, gaztelaniazko rapero historikoetako bat. 90. hamarkadan ekin zion bere ibilbideari, Violadores del Verso kolektiboko kide gisa. Ondoren, bakarkako ibilbidearekin jarraitu zuen, baita jazz talde batekin klub txikietan egindako jam session-ekin ere; hain zuzen, publikoaren erantzuna ikusita sortu zuen Jazz Magnetism lana.
Sarrerak eta abonamenduak
Azken baieztapen honekin programazioa itxita, maiatzaren 11tik aurrera (asteazkena) kontzertuetarako sarrerak eta abonamenduak salgai jarriko dituzte www.jazzvitoria.com webgunean: eguneko tiketen kasuan, prezioa 15 eta 40 euro artekoa izango da; abonamenduek, berriz, 55 eta 150 euro arteko prezioa izango dute, abonuetarako. Nolanahi ere, jarraitzaile gazteenek deskontu bereziak izango dituzte.
Programazioa osorik
Gasteizko Jazz Jaialdiak datozen asteetan argitzeko hainbat sorpresa dituen arren, Espainiako Estatuko rap musikaren mitoak aurtengo programazioa itxi du, aurrez iragarritako musikariei batuz. Honela gelditu da Gasteizko Jazzaldiaren programazioa, Principal Antzokian eta Mendizorrotzeko kiroldegian banatutako hamalau emanaldirekin:
- Uztailak 12:
- Principal Antzokian: Euskadiko Ikasleen Jazz Orkestra, Roberto Pachecok zuzenduta
- Uztailak 13:
- Principal Antzokian: Yessaï Karapetian piano-jotzaile armeniarra
- Mendizorrotzeko kiroldegian: Eliane Elias pianista eta abeslari brasildarra eta Giulia Valle Ensemble
- Uztailak 14:
- Principal Antzokian: Marcin Masecki pianista eta Jerzy Rogiewicz bateria-jotzailea, Poloniatik
- Mendizorrotzeko kiroldegian: Snarky Puppy taldea, New Yorketik, eta Yazz Ahmed tronpeta-jotzailearen laukotea
- Uztailak 15:
- Mendizorrotzeko kiroldegian: Xavi Torres piano-jotzailearen hirukotea eta Arturo Sandoval tronpeta-jotzaile kubatarra
- Uztailak 16:
- Principal Antzokian: James Brandon Lewis saxofonista eta Kassa Overall bateria, MC eta ekoizlea
- Mendizorrotzeko kiroldegian: Robert Glasper Texasko (AEB) pianista eta Theon Cross tuba-jotzaile eta konpositore britaniarra
- Uztailak 17:
- Mendizorrotzeko kiroldegian: Kase.O Jazz Magnetism, rap abeslariaren jazz rap proiektua