Gasteizko kirol instalazioetan eta gizarte etxeetan lan egiten duten sorosleak, begiraleak eta kontrolatzaileak grebara deitu dituzte sindikatuek. ELAk, LABek, CCOOk eta UGTk bost greba egun deitu dituzte datorren asterako Gasteizen, lan baldintzen inguruan enpresekin zabaldutako negoziazioak porrot egin ostean.
Disport Eki eta Aiteko dira gizarte etxeetako kirol jarduerak kudeatzen dituzten enpresa nagusiak, baina Gasteizko udalak azpikontratatutako zerbitzuaren baldintzak zehazten ditu. Horregatik, kirol jardueretako langileek udalari eskatu diote enpresen aurrean bitartekari lanak egiteko.
Aspalditik dator gatazka
Kirol jardueretako langileen aldarrikapenak ez dira berriak, eta 2019tik hona hainbat aldiz deitu dituzte lanuzteak, lan baldintzak hobetzeko asmoz eta lan hitzarmena hobetzeko. 2020ko irailean, greba mugagabeari ekin zioten Arabako kirol jardueretako langileek. Greba deialdiak Mendizorrotza eta Gamarrako igerilekuak ixtera behartu zuen, eta baita gizarte etxeetako ikastaro batzuk bertan behera uztera ere.