Oihaneder Euskararen Etxeak, Laboral Kutxaren laguntzarekin, otsailaren hasieran aurkeztu zituen formatu txikiko antzezlan eta bakarrizketentzako Taulara lehiaketaren bigarren edizioko irabazleak, urtarrilaren 24an lanak entregatzeko epea amaitu ostean.
Jatorrizko lan onenaren saria Benan Oregi Iñurrietaren Ezkaba 1938 lanarentzat izan zen —1.500 euro jasoko ditu—. Bigarren saria Oroitzapen gorriak (Ainhoa Ordoñez eta Erik Perianes) proposamenak irabazi zuen, eta hirugarrena, berriz, Titapia (Anaiz Mendiboure eta Iratxe Gallardo) lanari egokitu zaio; bi lan horien kasuan, 750 euroko sari bana jasoko dute egileek.
Orain, hiru antzerki lan horien aurkezpenak martxoaren 27an izango dira, Antzerkiaren Nazioarteko Egunean, Oihaneder Euskararen Etxean. Hiru lanen bi emanaldi egingo dira: 18:30ean eta 19:30ean. Lehenago, irabazleek zortzi asteko epea izan dute beren lanak prestatzeko. Aipatutako sariez gain, bertaratzen diren ikus-entzuleek publikoaren saria —500 euro—nori eman erabakiko dute.
Gonbidapenak dagoeneko eskuratu daitezke, ohiko kanaletatik: Bibe plataforman, 945 16 18 30 telefono zenbakian edo oihaneder@oihaneder.eus helbide elektronikoaren bitartez.
Proposamen arabarrak nagusi
Zortzi proposamen aurkeztu dira aurtengo ediziora, eta lanen "kalitate handia" nabarmendu zuten antolatzaileek. Proposamen arabarrak nagusitu dira, zortzi horietatik bost lurralde honetatik jaso baitira; beste bi Gipuzkoatik, eta bakarra Bizkaitik.
Gainera, epaimahaiak Araban ekoiztutako hiru lan aukeratu ditu, "kalitatea eta antzezgarritasuna, deialdi honetarako beren-beregi sortutako proposamena izatea, genero ikuspegia eta emakumeen zein 35 urtetik beherako gazteen presentzia" irizpidetzat hartuz.
