Gaur, osteguna, 20:30ean Buesa Arenan jokatzekoa zen Bitci Baskonia eta Unics Kazan talde errusiarraren arteko Euroligako partida, baina bertan behera geratu da Euroligako araudiaren 151. artikulua dela eta, Errusia eta Ukrainaren arteko gerraren ondorioz. Euroligak "prebentzio neurri" gisa hartu du erabakia.
Izan ere, bart goizaldean Errusiak erasoaldi militarra abiarazi du Ukrainaren aurka, azken hamarkadan zehar areagotzen joan den krisialdi politiko, geopolitiko eta militarraren testuinguruan. 2014an, Ukrainako gobernua ordeztu zuen Euromaidan izeneko estatu kolpearen ostean, Donbasseko Gerra piztu zen, Donetsk eta Luhanskeko Herri Errepubliketako indar independentisten eta Ukrainako gobernuaren zein indar ultraeskuindarren artean. Zortzi urteko gatazkaren ostean, Errusiaren esku-hartzeak —"operazio militar berezia" izendatu du Vladimir Putin presidenteak— gerra hotsak berpiztu ditu Europako ekialdean.
Bihar, ostiralean, Euroligako kluben arteko bilera egingo dute, eta bertan aztertuko da Ukrainako egoera, eta baita txapelketan izan ditzakeen ondorioak ere. Antolakuntzak talde errusiarrak inplikatuta dauden beste bi partida atzeratu ditu: Bayern-CSKA eta Zenit-Bartzelona ere ez dira jokatuko; gainerako partidak normaltasunez jokatuko dira.
Elkarretaratzea Gasteizen
Gaur egun, 500 ukrainar baino gehiago bizi dira Gasteizen, eta ziurgabetasun handiz bizi dute bart gauean hasitako gerra. Testuinguru horretan, Arabako hiriburuko ukrainar komunitateak elkarretaratzea deitu du 19:30ean Andre Maria Zuriaren plazan, Gerrari ez! lelopean.