Martxoaren 3ko Memoriala sortzeko "konpromisoa" berretsi dute erakundeek eta Elizbarrutiak

Gasteizko Udalak, Eusko Jaurlaritzak, Arabako Foru Aldundiak eta Gasteizko Elizbarrutiak Martxoaren 3ko Biktimen Memoriala sortzeko "konpromisoa" berretsi dute gaur, proiektuan egindako aurrerapausoen berri emateko eskainitako prentsaurrekoan. Ohikoa denez, aurretik Martxoak 3 Elkarteak ere ezagutzen ez zuen informazioa publiko egin dute El Correo egunkariaren bitartez; elkarteak berak "zentzugabekeria" gisa definitu du jokabide hori.

Ziurtatu dutenez, lau erakundeek hilabeteak daramatzate proiektua aurreratzen. Horren inguruan iragarri dituzten aurrerapauso nagusietan, ordea, nobedade gutxi topa daitezke:

• Asisko San Frantzisko elizan kokatuko da zentroa, Gasteizko Zaramaga auzoan. Erakundeek espero dute "2026a baino lehen" irekitzea

• Gotzaindegiak elizaren erabilera lagatzeko asmoa berretsi du. "Elizako eta haren inguruko gertakarien zama emozional handia dela eta, oroimena kokatzeko leku aproposa da", adierazi dute; elizak ez du erlijio-ofiziorik 2014az geroztik.

• Memorial Zentroa kudeatuko duen etorkizuneko fundazioaren estatutuak prestatzeko lanetan aurrera egin da. Iragarri dutenez, fundazioa "laster" eratuko da, eta harekin ideia lehiaketa bat jarriko dute abian.

• Eraikinaren benetako egoera ezagutzeko lehen urratsak eman dituzte.

Prentsaurrekoan izan dira Jose Antonio Rodriguez Ranz Eusko Jaurlaritzako Giza Eskubideen, Memoriaren eta Lankidetzaren sailburuordea, Ainhoa Campo Aldundiko Berdintasunerako eta Giza Eskubideetarako zuzendaria, Miren Fernandez de Landa Gasteizko Udaleko Bizikidetza eta Aniztasuneko zinegotzia, eta Carlos Garcia Llata Gasteizko Elizbarrutiko bikario nagusia. "Martxoaren 3ko memoriak guztion memoria izan behar du, guztiontzako", adierazi dute.

"Zentzugabekeria"

Prentsaurrekoan "gizarte ekimenarekiko, memoria erakundeekiko eta biktimen familiekiko lankidetza lana sendotu" egin dela ziurtatu duten arren, Martxoaren 3ko Biktimen Elkarteak gogor kritikatu du erakundeen jokabidea.

"Zentzugabekeria instituzionalak jarraitzen du: orain badakigu, egunkari bati filtratu ostean, nolakoa izango den gure ordezkaritza patronatuan. Egia esan, ez dugu dokumentu ofizialik jaso organo horretan parte hartzea aztertzeko eta onartzeko (edo ez onartzeko)", salatu dute. "Filtrazio hori gutxi balitz bezala, erakundeek agerraldia egin dute gaur, beren kabuz, proiektu horri buruz hitz egiteko; izan ere, ezinbesteko parte gara, baina ez dugu horri buruzko informazio berririk jaso. Hau ez da serioa, #M3moria daukagu", gaineratu dute.

Izan ere, hedabide gehienei bidalitako prentsa ohar ofizial laburrean ere agertzen ez den informazio bat argitaratu du El Correo egunkariak: "Martxoaren 3ko Memorialak patronatuko ateak ireki dizkie biktimei", dio titularrak. "Entitate bakoitzak –erakundeek eta Elizbarrutiak– bi ordezkari izango ditu batzarrean, beste bi Martxoaren 3ko Biktimen Elkarteari lagako zaizkio eta beste horrenbeste Memoria Gara diziplina anitzeko kolektiboari –memorialaren ideiari buruz hitz egin zuen lehena–", ziurtatzen du testuak.