Gasteizko Irakasle Eskola fakultateko gela bat okupatu dute gaur goizean Ikasle Abertzaleak-ek, Unibertsitateko Indar Batasunak eta Gasteizko Unibertsitateko Emakume Taldeak, "antolakuntza politikorako behar-beharrezkoa zaien espazioa" lortzeko.
Agiri batean azaldu dutenez, duela bi aste campusean zuten ikasle gela bakarra itxi zieten, hiru eragile hauen "jardun politikoa galaraziz".
Unibertsitatearen barruan gertatzen ari den "elitizazio prozesu" baten barruan kokatu dute gela hori itxi izana, eta erantsi dute EHUk hainbat "mekanismo klasista baliatzen" dituela. Besteak beste, pribatizazioaren zein enpresa pribatuen esku hartzearen gorakada, hezkuntza kalitatearen jaitsiera eta errepresio politikoa aipatu dituzte.
Campusaren barruan ikasle langileek errepresioa "modu nabarmenean jasan behar izaten" dutela diote; "zenbait fakultatetan jarri dituzten segurtasun kamerak, poliziaren jazarpena edota askatasun politikoen urraketa sistematikoa" horren adierazle dira, agiriaren arabera.
"Doakoa, kalitatezkoa eta unibertsala izango den hezkuntza ereduaren alde" borrokan jarraituko dutela aurreratu dute.