Gauekoak programak askotariko hogei bat proposamen eskainiko ditu ekainera bitartean

Erredakzioa 2022ko urt. 27a, 18:30

Idoia Ruiz, Miren Fernandez de Landa eta Oskar Fernandez Jaras. / GASTEIZKO UDALA

Gazteentzako aisialdi alternatibo eta hezigarrirako hemeretzi jarduera antolatuko ditu Gauekoak programak otsailetik aurrera. Ekainera bitartean, sorkuntza, musika, abentura, kirola, ikuskizunak eta askotariko tailerrak izango dira.

Berriz ere, hemen da Gauekoak programa: Gasteizko Udalak, Gazteria Zerbitzuaren bitartez, 16 eta 30 urte bitarteko gazteen artean aisialdi alternatibo, hezigarri eta osasungarria sustatzeko proposamena. Horretarako, gazteen arloko erakunde, elkarte zein herritar partikularrek egindako proposamenak garatzen ditu Gauekoak kolektiboak.

Otsailetik ekainera bitartean, hemeretzi jarduera —sorkuntza, umorea, kultura, musika, abentura, kirola, ikuskizunak, lantegiak...— antolatu dituzte, guztiak doakoak, betiere parte hartzea bultzatuz eta euskararen presentzia sustatuz —jardueren %60 hizkuntza horretan izango dira—. Gainera, Proiektuen Poltsa bat sortu dute ere, gazteek, kolektiboek eta elkarteek proposatutako ideiak jaso eta Gauekoak programaren barruan gauzatzeko aukera eskaintzeko.

"Aisialdian heztea gazteen garapen integralerako tresna baliotsuenetako bat da, eta Gauekoak da horren erakusgarri", nabarmendu du Gazteria zinegotzi Miren Fernandez de Landak.