Mendizabaleko aparkalekua berrireki dute jada, zoladura eraberritzeko milioi bat euroko inbertsioa —zehazki, 999.800 euro— egin eta gero. Azken lanak, bereziki margoketa, azken egunetan egin ditu Asfaltia enpresak, eta azpiegitura erabiltzaile guztientzat zabalik da, normaltasun osoz.
Izan ere, lanei ekin aurretik, aparkalekuaren asfaltoa, berdeguneak eta Lasarteko ateko sarbideak oso hondatuta zeuden, hainbat hamarkadatan berritu gabe izan ostean.
Orain, ordea, guztiz eraberrituta dago azpiegitura, disuasio aparkalekuak eta zoladurak hobetzeko plan baten barruko jardunari esker —Mugikortasun eta Espazio Publikoko sailaren 4 milioi eurotik gorako inbertsioa ekarriko duena—.
Gainera, hemendik aurrera —pandemiaren bilakaerak ahalbidetzen duenean, jakina—, aparkalekuaren funtzioa betetzeaz gain, jaialdi eta kultur zein kirol jarduera eta ekitaldiak hartuko ditu; esaterako, Azkena Rock jaialdia.