Koronabirusa

Hamaika positibo atzeman dituzte Gasteizko Sanitas egoitzan

2020ko martxoan, berrogeialdia ezarri zuen lehen egoitza izan zen San Martingoa. / SANITAS

Covid-19aren agerraldi batek gutxienez hamaika positibo utzi ditu jada Gasteizko San Martin auzoko Sanitas egoitzan. Kasu guztietan, gaixoak asintomatikoak dira edo sintoma arinak dituzte.

Ostegun honetan Eldiario.es hedabideak argitaratu duenez, 48 ordu eskasetan positibo bakarra izatetik gutxienez hamaika izatera igaro da Gasteizko Sanitas egoitzako agerraldia. Hedabide horrek zentroko iturrien bitartez baieztatu du kasu guztiak asintomatikoak edo sintoma arinekoak direla; gainera, guztiek txertaketa jarraibide osoa zuten —hirugarren dosia barne—, baina bi egoiliarren kasuan ez dute antigorputzik sortu.

Berrogeialdia egoitzan bertan betetzen ari dira egoiliarrek, zaintzapean, eta ez dute ospitalera joan beharrik izan. Nolanahi ere, bisitak murriztu zaizkie, prebentzio neurri gisa.

Zentro hau 2020ko otsailean eta martxoan Covid-19 positiboak erregistratu zituen lehen egoitza da. Alarma egoera indarrean sartu baino askoz lehenago ezarri behar izan zuen berrogeialdia, Espainiako Estatu osoan neurri hori hartu zuen lehena izanik. Agerraldiak ekainaren 5era arte iraun zuen, eta denbora horretan 69 positibo eta 19 hildako utzi zituen egoiliarren artean, langileen kasuan zenbatu gabe.

2021eko ekainean, zazpi kasu atzeman zituzten (sei egoiliar eta profesional bat) hildako bat utzi zuen beste agerraldi batean.

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide