Bideoklipa

'Pneuma', Krd'Krudo rap abeslari gasteiztarraren hurrengo lanaren aurrerapena

Krd'Krudo rap abeslari gasteiztarrak Pneuma bideoklipa kaleratu du, Archivos de desván bere hurrengo lanaren aurrerapen gisa. Disko berriak abenduaren 27an ikusiko du argia, eta 2018 eta 2019 bitartean idatzitako lau abesti bilduko ditu.

Zaramagako artista gazteak Pneuma abestiaren instrumentala eta ahotsa sortu eta diskoaren prozesu osoan parte hartu badu ere, kolaborazio ugari izan ditu kanta bera, bideoklipa zein diskoa aurrera ateratzeko.

Peio Elizondo eta Larri Larson (HHmaniakoestudio) ahotsen grabaketan, Urtzi (HHmaniakoestudio) bideoaren grabaketan eta edizioan, ErreQueR nahasketan eta masterizazioan, eta Unai Berbaindde ahotsen grabaketan eta masterizazioan. Gainera, datorren astelehenean argitaratuko den lanaren azala Zikutalarik diseinatu du.

Rap musikaren inguruan Gasteizen pil-pilean dagoen underground mugimenduaren kideetako bat da Krd'Krudo. Besteak beste, Zarata Selektion eta Musik Morralla musika proiektu autogestionatuetan aritu da azken urteetan.

Horrez gain, duela gutxi, rap abeslariak, produktoreak eta ikus-entzunezko ekoizleak biltzen dituen Apolo G's kolektiboa sortu du BRN, Larri Larson, Kemena, JLM Beats eta Urtzirekin batera. Abenduaren 10ean estreinatu zuten Ahí estoy, proiektu berriaren lehen bolumena.

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide